ముదిరాజులను బీసీ-డీ నుంచి బీ సి-ఏ, ట్యాంక్ బండ్ పై పండుగ సాయన్న
విగ్రహం ఏర్పాటుకు సీఎం సానుకూల స్పందన..
ప్రజా పోరాట యోధుల చరిత్రకు గుర్తింపు ఇవ్వడం అభినందనీయం: నీలం మధు ముదిరాజ్
పండుగ సాయన్న ముదిరాజ్ జయంతిని అధికారికంగా నిర్వహించిన సీఎం రేవంత్‌రెడ్డికి కృతజ్ఞతలు..
అమ్మవారి విగ్రహం బహూకరించిన నీలం..
హైదరాబాద్‌ ,మనవార్తలు ప్రతినిధి :
తెలంగాణ ప్రజల కోసం పోరాడిన పండుగ సాయన్న జయంతి వేడుకలను రాష్ట్ర ప్రభుత్వం అధికారికంగా నిర్వహించడం ఆయన చరిత్రకు దక్కిన గొప్ప గౌరవమని ప్రజా పోరాట యోధుల జీవితాలను గుర్తించి, వారి స్ఫూర్తిని భావితరాలకు అందించడంలో ముఖ్యమంత్రి రేవంత్‌రెడ్డి చొరవ అభినందనీయమని మెదక్ పార్లమెంట్ కాంగ్రెస్ పార్టీ ఇన్‌చార్జి నీలం మధు ముదిరాజ్ అన్నారు. గురువారం హైదరాబాద్‌లోని రవీంద్ర భారతిలో మంత్రులు వాకిటి శ్రీహరి, పొన్నం ప్రభాకర్, వివేక్ వెంకటస్వామి పర్యవేక్షణలో అధికారికంగా నిర్వహించిన 174 వ పండుగ సాయన్న ముదిరాజ్ జయంతి వేడుకలకు ముఖ్యమంత్రి రేవంత్‌రెడ్డి హాజరై పాల్గొని సాయన్న చిత్రపటానికి పూలు వేసి నివాళులు అర్పించడం పట్ల నీలం హర్షం వ్యక్తం చేశారు. తెలంగాణ రాబిన్‌హుడ్‌గా ప్రజల హృదయాల్లో నిలిచిన పండుగ సాయన్నకు అధికారికంగా గుర్తింపు కల్పించిన ముఖ్యమంత్రికి నీలం మధు ప్రత్యేక కృతజ్ఞతలు తెలిపారు.
పండుగ సాయన్న వంటి ప్రజా పోరాట యోధుల చరిత్రను కేవలం జయంతి వేడుకలకే పరిమితం చేయకుండా, వారి జీవిత విశేషాలను యువతకు పరిచయం చేయాల్సిన అవసరం ఉందని సీఎం పేర్కొన్నారు. సమాజంలో అన్యాయాలను ఎదిరించి, పేదల పక్షాన నిలిచిన మహనీయుల చరిత్రను ప్రజల్లోకి తీసుకెళ్లడం ద్వారా సామాజిక చైతన్యాన్ని పెంపొందించవచ్చన్నారు.తెలంగాణ చరిత్రలో పండుగ సాయన్న ప్రజల కోసం పోరాడిన వీరుడిగా ప్రత్యేక గుర్తింపు పొందారని వివరించారు. అప్పటి సామాజిక పరిస్థితుల్లో పేదలు, బలహీన వర్గాలు ఎదుర్కొన్న దోపిడీ, అసమానతలకు వ్యతిరేకంగా ఆయన సాగించిన పోరాటం ప్రజల్లో విశేష ఆదరణ పొందిందన్నారు.
ప్రజల్లో ప్రాచుర్యంలో ఉన్న కథనాల ప్రకారం, సంపన్నుల నుంచి సంపదను తీసుకుని పేదలకు పంచేవాడిగా సాయన్న పేరు గావించారని అందుకే ఆయనను ప్రజలు ప్రేమతో తెలంగాణ రాబిన్‌హుడ్‌గా పిలుచుకుంటారన్నారు.
పండుగ సాయన్న జీవితం సామాజిక న్యాయం, సమానత్వం, పేదల పట్ల బాధ్యత వంటి విలువలకు ప్రతీకగా నిలుస్తుందని తెలిపారు. అన్యాయాన్ని ప్రశ్నించడం, బలహీనులకు అండగా నిలవడం, ప్రజల హక్కుల కోసం పోరాడడం వంటి అంశాలు సాయన్న చరిత్రలో కనిపిస్తాయని పేర్కొన్నారు. నేటి తరానికి ఆయన జీవిత విశేషాలను తెలియజేయడం ద్వారా సామాజిక బాధ్యత, సేవాభావం వంటి స్ఫూర్తిదాయకమైన విలువలను అందించవచ్చన్నారు.
పండుగ సాయన్న జయంతిని అధికారికంగా నిర్వహించడం ఈ దిశగా ఒక మంచి అడుగుగా అభివర్ణించారు.
ప్రజల కోసం పోరాడిన వీరుల జీవితాలు నేటి సమాజానికి కూడా మార్గదర్శకంగా నిలుస్తాయని, పండుగ సాయన్న స్ఫూర్తి యువతలో సామాజిక చైతన్యాన్ని పెంపొందించాలని ఆకాంక్షించారు. ఈ కార్యక్రమంలో మంత్రులు, ఎమ్మెల్యేలు, ఎంపీలు, ముదిరాజ్ సంఘం నాయకులు, ముదిరాజులు తదితరులు పాల్గొన్నారు..
