మనవార్తలు ప్రతినిధి ,పటాన్ చెరు:
సంగారెడ్డి జిల్లా పటాన్ చెరు పట్టణంలోని శాంతినగర్లో గోపాల్ దాస్ సిద్ధి వినాయక ఉత్సవ కమిటీ ఆధ్వర్యంలో వినాయక చవితి నవరాత్రి ఉత్సవాలు అంగరంగ వైభవంగా సాగుతున్నాయి. కమిటీ అధ్యక్షుడు మల్లేశం నేతృత్వంలో నిర్వహించిన ఈ వేడుకలు స్థానిక భక్తులను విశేషంగా ఆకట్టుకున్నాయి.నవరాత్రులలో భాగంగా తొమ్మిదవ రోజున మల్లేశం తన కుటుంబ సభ్యులు మరియు బస్తీవాసులతో కలసి విఘ్నేశ్వరుడికి ప్రత్యేక పూజలు, అర్చనలు నిర్వహించారు. అనంతరం దాదాపు 500 మంది భక్తులకు ఘనంగా అన్నప్రసాద వితరణ చేపట్టారు.
ఈ సందర్భంగా కమిటీ అధ్యక్షుడు మల్లేశం మాట్లాడుతూ”గణపతి స్వామివారి దివ్య ఆశీస్సులతో గత 5 సంవత్సరాలుగా ఇక్కడ వినాయక విగ్రహాన్ని ప్రతిష్టించి పూజా కార్యక్రమాలు నిర్వహిస్తున్నాం. ఆ లంబోదరుని కృపతో పట్టణ ప్రజలందరూ సుఖసంతోషాలు, ఆయురారోగ్యాలతో వర్ధిల్లాలని కోరుకుంటున్నాం” అని తెలిపారు.
ఈ కార్యక్రమంలో ఉత్సవ కమిటీ సభ్యులు, శాంతినగర్ బస్తీవాసులు మరియు పెద్ద సంఖ్యలో భక్తులు పాల్గొని పూజలను దిగ్విజయం చేశారు.
