ముత్తంగి డివిజన్ సమగ్ర అభివృద్ధికి భారీగా నిధులు

రూ.1.83 కోట్లతో సీసీ రోడ్లు, ప్రహరీ గోడ నిర్మాణ పనులకు శంకుస్థాపన చేసిన ఎమ్మెల్యే జిఎంఆర్

చట్ పూజ సందర్భంగా ఉత్తర భారతీయులకు చెరుకు పంపిణీ

పటాన్‌చెరు, మనవార్తలు ప్రతినిధి:

శరవేగంగా అభివృద్ధి చెందుతున్న ముత్తంగి డివిజన్ పరిధిలోని ప్రతి కాలనీలో ప్రజలకు అవసరమైన మౌలిక సదుపాయాలు కల్పించడమే లక్ష్యంగా విధులు కేటాయిస్తూ.. అభివృద్ధి పనులు చేపడుతున్నామని పటాన్‌చెరు శాసనసభ్యులు గూడెం మహిపాల్ రెడ్డి తెలిపారు.ముత్తంగి డివిజన్ కేంద్రంలోని మధురానగర్, గాయత్రి కాలనీలలో రూ.1.70 కోట్ల అంచనా వ్యయంతో నిర్మించనున్న సీసీ రోడ్ల పనులకు, ఘనపూర్ గ్రామంలో రూ.13 లక్షల అంచనా వ్యయంతో నిర్మించనున్న వార్డు కార్యాలయ ప్రహరీ గోడ నిర్మాణ పనులకు ఎమ్మెల్యే జిఎంఆర్ ముఖ్యఅతిథిగా హాజరై శంకుస్థాపన చేశారు.ఈ సందర్భంగా ఆయన మాట్లాడుతూ ముత్తంగి డివిజన్ పరిధిలోని కాలనీలు, వార్డులలో ప్రజల అవసరాలకు అనుగుణంగా సీసీ రోడ్లు, డ్రైనేజీలు, ఇతర మౌలిక సదుపాయాల అభివృద్ధికి ప్రణాళికాబద్ధంగా నిధులు కేటాయిస్తున్నామని తెలిపారు. అభివృద్ధి పనులను నాణ్యతా ప్రమాణాలతో వేగవంతంగా పూర్తి చేసి ప్రజలకు అందుబాటులోకి తీసుకురావాలని అధికారులకు సూచించారు. అధికారులు నిరంతరం క్షేత్రస్థాయిలో పర్యటిస్తూ ప్రజలు ఎదుర్కొంటున్న సమస్యలను ఎప్పటికప్పుడు తెలుసుకుంటూ.. వాటి పరిష్కారానికి కృషి చేయాలని సూచించారు.

చట్ పూజ సందర్భంగా చెరుకు పంపిణీ

ఉత్తర భారతీయులు అత్యంత భక్తిశ్రద్ధలతో నిర్వహించుకునే పవిత్ర చట్ పూజ పండుగను పురస్కరించుకొని ముత్తంగి డివిజన్ కేంద్రంలో ఏర్పాటు చేసిన కార్యక్రమంలో స్థానిక ఉత్తర భారతీయులకు ఎమ్మెల్యే గూడెం మహిపాల్ రెడ్డి తన సొంత నిధులతో కొనుగోలు చేసిన చెరుకును పంపిణీ చేశారు. పండుగ శుభాకాంక్షలు తెలియజేస్తూ, అన్ని ప్రాంతాలు, వర్గాల ప్రజలు సోదరభావంతో పండుగలను జరుపుకోవాలని ఆకాంక్షించారు.ఈ కార్యక్రమాల్లో సీనియర్ నాయకులు గూడెం మధుసూదన్ రెడ్డి, మాజీ జెడ్పీటీసీ శ్రీకాంత్ గౌడ్, మాజీ ఎంపీపీ యాదగిరి యాదవ్, ఆత్మ కమిటీ మాజీ చైర్మన్ కుమార్ గౌడ్, చంద్రశేఖర్ రెడ్డి, కాశీరెడ్డి, మాజీ సర్పంచ్ ఉపేందర్, మాజీ వైస్ ఎంపీపీ ప్రభాకర్, బీఆర్ఎస్ పార్టీ సీనియర్ నాయకులు మేరాజ్ ఖాన్, రామకృష్ణ, డీఈ కృష్ణవేణి తదితరులు పాల్గొన్నారు.