ప్రసిద్ధ దర్శకుడు సుకుమార్ ను కలిసిన గీతం అధ్యాపకుడు

పరిశోధనా ప్రతుల సమర్పణ

సుకుమార్ పుస్తకానికి ముందుమాట

మనవార్తలు ప్రతినిధి ,పటాన్ చెరు:

హైదరాబాదులోని గీతం స్కూల్ ఆఫ్ హ్యుమానిటీస్ అండ్ సోషల్ సైన్సెస్ లో అసిస్టెంట్ ప్రొఫెసర్ గా పనిచేస్తున్న డాక్టర్ జె.డి. ప్రభాకర్, ప్రఖ్యాత భారతీయ చిత్ర నిర్మాత, దర్శకుడు, కథా సంభాషణల రచయిత సుకుమార్ ను ఇటీవల కలిశారు. దేశీయ భాషల సామాజిక-ఆర్థిక ప్రాముఖ్యతను, సుస్థిర జాతీయాభివృద్ధిలో వాటి పాత్రను వివరిస్తూ తాను చేసిన పరిశోధనను ఆయనకు అందజేశారు.డాక్టర్ ప్రభాకర్ తన మూడు రచనలైన ‘సోషియో-ఎకనామిక్ ప్రొఫైలింగ్ ఆఫ్ ఇండియన్ లాంగ్వేజెస్’, ‘ఇండిజినస్ లాంగ్వేజెస్ యాజ్ ఇంజిన్స్ ఆఫ్ ఎకనామిక్ డెవలప్ మెంట్’, ‘లాంగ్వేజ్ (ఆర్థిక వ్యవస్థ – భాష)’లను సుకుమార్ కు ఇచ్చారు.ఉపాధి, ఆర్థిక సమ్మిళతం, జాతీయాభివృద్ధికి దోహదపడగల వాటి సామర్థ్యాన్ని ప్రదర్శించడం ద్వారా, మాతృభాషా ఆధారిత విద్యతో సహా దేశీయ భాషలను బలోపేతం చేయాలని ఆయన పరిశోధన వాదిస్తుంది. డాక్టర్ ప్రభాకర్ కృషి హైడెల్ బర్గ్ విశ్వవిద్యాలయం, లండన్ విశ్వవిద్యాలయం, హంబోల్డ్ విశ్వవిద్యాలయంతో సహా ప్రతిష్టాత్మక అంతర్జాతీయ విద్యా సేకరణలలో నమోదు కావడం ద్వారా గుర్తింపు పొందింది.దృశ్య కథనం, కథన నిర్మాణం, కథా సంభాషణలలో (స్క్రీన్ రైటింగ్) సుకుమార్ విలక్షణమైన విధానాన్ని పరిశీలించే ఒక పాండిత్య గ్రంథమైన, డాక్టర్ ప్రవీణ్ యజ్జల రచించిన ‘స్క్రీన్ ప్లే రైటర్ మాస్టర్ సుకుమార్’ పుస్తకానికి డాక్టర్ ప్రభాకర్ ముందు మాటను కూడా రాశారు.సాంస్కృతిక పురోగతి, ఆర్థిక సాధికారత, జాతీయ అభివృద్ధికి కీలకమైన ఆస్తులుగా ఉన్న భారతీయ భాషలను పరిరక్షించడం, ప్రోత్సహించడంపై విద్యావేత్తలకు, సినిమా రంగానికి ఈ సమావేశం ఒక ఉమ్మడి చర్చకు వేదికగా నిలిచింది.