సుగంధ పుష్పాల అలంకరణలో భక్తులకు దర్శనమిచ్చిన సిద్ధి గణపతి

రుద్రారం శ్రీ గణేష్ గడ్డ సిద్ధి గణపతి దేవస్థానంలో కన్నులపండువగా

వినాయక చవితి వార్షిక బ్రహ్మోత్సవాలు

 మనవార్తలు ప్రతినిధి ,పటాన్ చెరు:

ప్రసిద్ధ పుణ్యక్షేత్రమైన రుద్రారంలోని శ్రీ గణేష్ గడ్డ సిద్ధి గణపతి దేవస్థానంలో శ్రీ వినాయక చవితి వార్షిక బ్రహ్మోత్సవాలు అత్యంత వైభవంగా, కన్నులపండువగా కొనసాగుతున్నాయి. బ్రహ్మోత్సవాల్లో భాగంగా 11వ రోజు దేవాలయంలో స్వామివారికి శోభాయమానంగా ప్రత్యేక పూజా కార్యక్రమాలను నిర్వహించారు.ఈ రోజు సిద్ధి గణపతి స్వామివారు నయన మనోహరమైన పలువర్ణాల సుగంధ పుష్పాల అలంకరణలో భక్తులకు దివ్య మంగళ దర్శనమిచ్చారు. రంగురంగుల పుష్పాలతో తీర్చిదిద్దిన విశేష వర్ణాల అలంకరణలో స్వామివారి రూపాన్ని దర్శించుకుని భక్తజనం పులకించిపోయారు.సూర్యోదయం నుంచే ఆలయ అర్చకులు స్వామివారికి విశేష అభిషేకాలు, ద్రవ్య అర్చనలు, మహాన్యాస పూర్వక రుద్రాభిషేకాలు మరియు సహస్ర నామార్చనలను శాస్త్రోక్తంగా నిర్వహించారు. అనంతరం స్వామివారిని పలు రకాల విదేశీ, స్వదేశీ సుగంధ పుష్పాలతో సుందరంగా అలంకరించి మహామంగళ హారతి ఇచ్చారు.స్వామివారి విశేష అలంకార దర్శనానికి పరిసర ప్రాంతాల నుంచే కాకుండా దూర ప్రాంతాల నుంచి కూడా భక్తులు విశేష సంఖ్యలో తరలివచ్చారు. ఆలయ ప్రాంగణమంతా “ఓం శ్రీ గణేశాయ నమః”, “గాణపత్య బాపా మోరియా” అనే నామస్మరణలతో మారుమోగింది. భక్తులకు ఎలాంటి అసౌకర్యం కలగకుండా ఆలయ కమిటీ నిర్వాహకులు ప్రత్యేక క్యూలైన్లు, మంచినీటి సదుపాయం, ప్రసాద వితరణ ఏర్పాట్లను పర్యవేక్షించారు. ఆలయ తీర్థప్రసాదాలను స్వీకరించి భక్తులు స్వామివారి కృపాకటాక్షాలను పొందారు.