రాయదుర్గంలో పండగల సాయన్న ముదిరాజ్ జయంతి వేడుకలు

 మనవార్తలు ప్రతినిధి – శేరిలింగంపల్లి :

తెలంగాణ రాబిన్‌హుడ్‌గా ప్రజల మనస్సుల్లో చిరస్థాయిగా నిలిచిన పండగల సాయన్న ముదిరాజ్ 174వ జయంతి వేడుకలను హైదరాబాద్‌లోని శేరిలింగంపల్లి పరిధి రాయదుర్గంలో ఘనంగా నిర్వహించారు. గ్రామ ముదిరాజ్ సంఘం ఆధ్వర్యంలో జరిగిన ఈ కార్యక్రమంలో సాయన్న చిత్రపటానికి పూలమాలలు వేసి నివాళులర్పించారు.
ముదిరాజ్ జెండా ఆవిష్కరణ మరియు రాయదుర్గం గ్రామంలో పండుగ సాయన్న నినాదాలు తో పాదయాత్ర నిర్వహించారు.

ఈ సందర్భంగా గ్రామ ముదిరాజ్ నాయకులు మాట్లాడుతూ పండగల సాయన్న ధైర్యసాహసాలు, పేదలు, బడుగు బలహీన వర్గాల కోసం చేసిన సేవలను గుర్తుచేశారు. అన్యాయాన్ని ఎదిరిస్తూ సామాన్యులకు అండగా నిలిచిన ఆయన జీవితం నేటి యువతకు స్ఫూర్తిదాయకమన్నారు. సామాజిక న్యాయం కోసం ఆయన సాగించిన పోరాటాలు తెలంగాణ సమాజంలో ప్రత్యేక గుర్తింపు పొందాయని పేర్కొన్నారు.సాయన్న జయంతిని అధికారికంగా నిర్వహించాలని రాష్ట్ర ప్రభుత్వం ప్రకటించడం హర్షణీయమన్నారు.

ఈ గుర్తింపు ముదిరాజ్ సమాజంతోపాటు బడుగు, బలహీన వర్గాల ఆత్మగౌరవాన్ని మరింత పెంచుతుందని అభిప్రాయపడ్డారు. ఆయన ఆశయాలను భావితరాలకు చేరవేయాలని, బీసీ వర్గాల ఐక్యత, సామాజిక చైతన్యం, సమానత్వ సాధనకు ప్రతి ఒక్కరూ కృషి చేయాలని పిలుపునిచ్చారు. ఈ కార్యక్రమంలో రాయదుర్గం ముదిరాజ్ సంఘం ప్రతినిధులు, యువకులు, గ్రామస్థులు పాల్గొన్నారు.