గోనేమ్మ బస్తీలో ఘనంగా గణేష్ నవరాత్రి ముగింపు

తొలిసారిగా లడ్డూ వేలం.. రికార్డు ధరలు

రూ.1.53 లక్షలకు తొలి లడ్డూ.. రూ.59 వేలు, రూ.30 వేలకు మరో రెండు

చిన్నారుల నృత్యాలు.. డప్పులు, డ్యాన్సులతో హోరెత్తిన బస్తీ

లడ్డూ విజేతలకు యూత్ అధ్యక్షుడు బాయికాడి వెంకటేష్ సత్కారం

మనవార్తలు ప్రతినిధి ,పటాన్ చెరు:

గణేష్ నవరాత్రి ముగింపు వేళ గోనేమ్మ బస్తీ పండుగ శోభను సంతరించుకుంది. బస్తీలో తొలిసారిగా నిర్వహించిన గణేష్ లడ్డూ ప్రసాదం వేలం రికార్డు ధరలతో ఆకట్టుకుంది. గోనేమ్మ యూత్ అసోసియేషన్ ఆధ్వర్యంలో గురువారం నిర్వహించిన వేలంలో తొలి లడ్డూ రూ.1,53,000లకు భాశెట్టి ఆదిత్య దక్కించుకున్నారు. రెండో లడ్డూను నాయి కోటి, సాయి కిరణ్ రూ.59,000లకు, మూడో లడ్డూను పోచారం మనోజ్ రూ.30,000లకు సొంతం చేసుకున్నారు. వేలం సందర్భంగా భక్తులు ఉత్సాహంగా పాల్గొనడంతో బస్తీలో సందడి నెలకొంది.లడ్డూ వేలం ప్రారంభం నుంచి భక్తుల్లో ఉత్కంఠ నెలకొంది. ధరలు పెరుగుతూ పోవడంతో స్థానికులు ఆసక్తిగా తిలకించారు. తొలి లడ్డూకు రూ.1.53 లక్షల ధర పలకడంతో నిర్వాహకులు, బస్తీ పెద్దలు, యూత్ సభ్యులు చప్పట్లతో అభినందించారు.

నవరాత్రి ముగింపు సందర్భంగా గణనాథుడిని ప్రత్యేకంగా అలంకరించి బస్తీ పురవీధుల్లో ఘనంగా ఊరేగించారు. చిన్నారుల నృత్యాలు, యువత డ్యాన్సులు, డప్పుల మోతతో గోనేమ్మ బస్తీ మార్మోగింది. మహిళలు, యువత, చిన్నారులు, బస్తీ వాసులు పెద్ద సంఖ్యలో పాల్గొని ఉత్సవాన్ని మరింత వైభవంగా మార్చారు.ఊరేగింపు అనంతరం గణనాథుడిని తిమ్మక్క చెరువు వద్దకు తీసుకెళ్లారు. అక్కడ ప్రత్యేక పూజలు నిర్వహించి భక్తుల జయజయధ్వానాల మధ్య గణనాథుడిని గంగమ్మ ఒడికి చేర్చారు.

లడ్డూ వేలంలో విజేతలుగా నిలిచిన భాశెట్టి ఆదిత్య, నాయి కోటి–సాయి కిరణ్, పోచారం మనోజ్‌లను గోనేమ్మ యూత్ అసోసియేషన్ అధ్యక్షుడు బాయికాడి వెంకటేష్ శాలువాలు, పూలమాలలతో ఘనంగా సత్కరించారు. విజేతలకు అభినందనలు తెలిపి గణనాథుడి ఆశీస్సులు అందరికీ ఉండాలని ఆకాంక్షించారు.ఈ ఏడాది గణేష్ నవరాత్రి ఉత్సవాలను యూత్ అసోసియేషన్ సభ్యుల ఆధ్వర్యంలో బస్తీ వాసులు, బస్తీ పెద్దలు, వివిధ కుల సంఘాల సభ్యులు, యువత సమన్వయంతో నిర్వహించారు.తొలిసారిగా నిర్వహించిన లడ్డూ వేలంలో రికార్డు ధరలు పలకడం, చిన్నారులు–యువత ఉత్సాహంగా పాల్గొనడం, బస్తీ మొత్తం పండుగ వాతావరణంలో నిమజ్జన వేడుకలు జరగడం గోనేమ్మ బస్తీ గణేష్ ఉత్సవాలకు ప్రత్యేక ఆకర్షణగా నిలిచింది.