విక్రమ్ గౌడ్ ఆధ్వర్యంలో అన్నదానం

భక్తులకు స్వయంగా అన్నప్రసాదం వడ్డించిన కాట శ్రీనివాస్ గౌడ్ దంపతులు

మనవార్తలు ప్రతినిధి ,పటాన్ చెరు:

ఇస్నాపూర్ మున్సిపాలిటీ పరిధిలోని రుద్రారం గ్రామంలో ప్రసిద్ధి చెందిన శ్రీ గణేష్ దేవస్థానం (గణేష్ గడ్డ) లో వినాయక చవితి నవరాత్రి ఉత్సవాలు భక్తిశ్రద్ధలతో, వైభవంగా కొనసాగుతున్నాయి. ఆలయ ప్రాంగణం గణపతి నామస్మరణతో, వేద మంత్రోచ్ఛారణలతో ఆధ్యాత్మిక శోభను సంతరించుకుంది. ప్రతిరోజూ ప్రత్యేక పూజలు, అభిషేకాలు, అలంకరణలు నిర్వహిస్తుండటంతో స్వామివారిని దర్శించుకునేందుకు పరిసర ప్రాంతాల నుంచి పెద్ద సంఖ్యలో భక్తులు తరలివస్తున్నారు.ఉత్సవాల్లో భాగంగా పటాన్‌చెరు నియోజకవర్గ కాంగ్రెస్ పార్టీ ఇన్‌చార్జ్ కాట శ్రీనివాస్ గౌడ్, ఆయన సతీమణి, సంగారెడ్డి జిల్లా మహిళా కాంగ్రెస్ అధ్యక్షురాలు కాట సుధా శ్రీనివాస్ గౌడ్ దంపతులు గణేష్ గడ్డ శ్రీ గణేష్ దేవస్థానాన్ని సందర్శించి స్వామివారిని దర్శించుకున్నారు. ఈ సందర్భంగా భక్తిశ్రద్ధలతో ప్రత్యేక పూజలు నిర్వహించి, విఘ్నేశ్వరుని ఆశీస్సులు పొందారు. అనంతరం ఆలయ అర్చకులు వేద మంత్రోచ్ఛారణల మధ్య కాట శ్రీనివాస్ గౌడ్ దంపతులకు ఆశీర్వచనాలు అందించి, తీర్థప్రసాదాలను అందజేశారు. ఈ సందర్భంగా ఆలయ నిర్వాహకులు కాట దంపతులను ఘనంగా సన్మానించి స్వామివారి ఆశీస్సులు అందించారు. ఆలయ ప్రాంగణంలో భక్తులు గణపతి నామస్మరణ చేస్తూ, భక్తి పారవశ్యంలో స్వామివారిని దర్శించుకున్నారు.

భక్తులకు అన్నదానం

ఉత్సవాల సందర్భంగా నందిగామ సర్పంచ్ విక్రమ్ గౌడ్ ఆధ్వర్యంలో ఆలయ ప్రాంగణంలో భక్తుల కోసం ప్రత్యేకంగా అన్నదాన కార్యక్రమాన్ని నిర్వహించారు. భక్తులకు భోజన వసతి కల్పిస్తూ నిర్వాహకులు చేసిన సేవలను పలువురు అభినందించారు. అన్నదానం మహాదానంగా భావించే సంప్రదాయంలో భాగంగా భక్తులకు ప్రేమతో అన్నప్రసాదాన్ని అందించారు.ఈ సందర్భంగా కాట శ్రీనివాస్ గౌడ్ దంపతులు భక్తులకు స్వయంగా అన్నప్రసాదం వడ్డించడం ప్రత్యేక ఆకర్షణగా నిలిచింది. భక్తులకు స్వయంగా వడ్డిస్తూ వారి యోగక్షేమాలను అడిగి తెలుసుకున్నారు. ఆలయ ప్రాంగణంలో భక్తి, సేవాభావం కలగలిసిన ఆధ్యాత్మిక వాతావరణం నెలకొంది.విఘ్నాలను తొలగించే విఘ్నేశ్వరుని కృపతో ప్రజలందరూ సుఖసంతోషాలతో ఉండాలని, పాడిపంటలు సమృద్ధిగా పండాలని, ప్రతి కుటుంబంలో ఆయురారోగ్యాలు, ఐశ్వర్యం వెల్లివిరియాలని భక్తులు ప్రార్థించారు. నవరాత్రి ఉత్సవాలు కొనసాగుతున్న నేపథ్యంలో రానున్న రోజుల్లో మరిన్ని ప్రత్యేక పూజలు, ఆధ్యాత్మిక కార్యక్రమాలు నిర్వహించనున్నట్లు ఆలయ నిర్వాహకులు తెలిపారు.